Skáldsagan Armadale eftir Wilkie Collins kom fyrst út á árunum 1864–66. Hún er ein af fjórum sem taldar eru hans bestu skáldsögur, en hinar eru The Woman in White (1859–60), No Name (1862) og The Moonstone (1868).

Við upphaf sögunnar játar hinn aldraði Allan Armadale syndir sínar á dánarbeði sínu og mælir svo fyrir að sonur sinn fái skrásetta játninguna í hendur þegar hann nær fullorðinsaldri – með ófyrirsjáanlegum afleiðingum. Inn í söguna fléttast ástir, álög, njósnir, peningar, mannavillt, morð, og ein umdeildasta kvenpersóna nítjándu aldar bókmennta.